କଣ୍ଟାମାଳ, 01/03/24 (ପ୍ରଭାତ କୁମାର ସାହୁ) ବୌଦ୍ଧ ଜିଲ୍ଲାରେ ଥିବା ସମସ୍ତ ଥାନା ମାନଙ୍କ ମଧ୍ୟରୁ ବଡ ଥାନା ଭାବରେ କଣ୍ଟାମାଳ ଥାନାକୁ ଗଣନା କରାଯାଏ | ହେଲେ ଏହି ଥାନାରେ ଦୀର୍ଘ ୩ ରୁ ୪ ସପ୍ତାହ ହେବ ଥାନା ଅଧିକାରୀ ନାହାଁନ୍ତି | ଯାହା ଫଳରେ କଣ୍ଟାମାଳ ଥାନା ଏବେ ଇନଚାର୍ଜରେ ଚାଲିଛି।ସୂଚନା ଥାଉ କି ଗତ ଫେବୃୟାରୀ ମାସ ୯ ତାରିଖରେ ଥାନା ଅଧିକାରୀ ଗୋପୀନାଥ ପ୍ରଧାନଙ୍କ କନ୍ଧମାଳ ଜିଲ୍ଲା ଫିରିଙ୍ଗିଆ ଥାନାକୁ ବଦଳି ହୋଇଯାଇଛି | ସେ ଫିରିଙ୍ଗିଆ ଥାନାରେ ଯୋଗଦେବା ପରେ ଉକ୍ତ ଥାନାକୁ ବଦଳ ଥାନା ଅଧିକାରୀ କେହି ଆସିନାହାନ୍ତି। ପ୍ରକାଶଯୋଗ୍ୟ ଯେ, ଏହି ଥାନା ଉପରେ କଣ୍ଟାମାଳ ବ୍ଲକ ର ପାଖାପାଖି ୧୦୦ଖଣ୍ଡ ଗ୍ରାମର ଲକ୍ଷାଧିକ ଜନ ସାଧାରଣ ଆଇନ ଶୃଙ୍ଖଳା ପରିସ୍ଥିତି ପାଇଁ ନିର୍ଭର କରିଥାନ୍ତି | ଗଞ୍ଜେଇ ଚୋରାଚାଲାଣ ର ପେଣ୍ଠସ୍ଥଳୀ କୁହା ଯାଉଥିବା ଏହି ଥାନା ଅଂଚଳରେ ଚୋରି , ଡକାୟତି , ରାହାଜାନି , ଲୁଟତରାଜ୍,ଆସାମାଜିକ କାର୍ଯ୍ୟ ଆଦି ଅପରାଧିକ କାର୍ଯ୍ୟକଳାପ ନିତିଦିନିଆ ଘଟଣା ହୋଇଥିବା ବେଳେ ଥାନା ଅଧିକାରୀ ନ ଥିବାରୁ ଅନେକ ମାମଲା ପଡ଼ି ରହିଛି | ଅନ୍ୟପଟେ ଆଗକୁ ସାଧାରଣ ନିର୍ବାଚନ ଆସୁଥିବାରୁ ଅନେକ ଅପରାଧିକ ଓ ଅସାମାଜିକ କାର୍ଯ୍ୟକଳାପ ବୃଦ୍ଧି ପାଇବାର ଆଶଙ୍କା ରହିଥିବା ବେଳେ ପୂର୍ବ ବର୍ଷ ମାନଙ୍କରେ ଅନେକ ମାମଲା ପଞ୍ଜୀକୃତ ହୋଇଥିବାର ମଧ୍ୟ ନଜିର ରହିଛି | ଆଉ କିଛି ସପ୍ତାହ ପରେ ନିର୍ବାଚନ ହେଉ ଥିବାରୁ କଣ୍ଟାମାଳ ଥାନାରେ ଥାନା ଅଧିକାରୀ ନିଯୁକ୍ତି ନ ଦେବା ଫଳରେ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି | ସୂଚନା ଥାଉ କି ପୂର୍ବରୁ ଆଇନ୍ ଶୃଙ୍ଖଳା ପରିସ୍ଥିତି ବିପର୍ଯ୍ୟସ୍ତ ହୋଇ ପଡ଼ି ଥିବା ବେଳେ ଯୁବ ଦକ୍ଷ ପୋଲିସ ଅଧିକାରୀ ନଳିନୀକାନ୍ତ ଦାସଙ୍କୁ ଥାନା ଅଧିକାରୀ ଭାବରେ ନିଯୁକ୍ତି ଦିଆ ଯାଇଥିଲା | ଖୁବ୍ କମ୍ ସମୟ ମଧ୍ୟରେ ସେ ଆଇନ୍ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣକୁ ଆଣିବା ପରେ ପରେ ତାଙ୍କୁ ବଦଳି କରି ଦିଆଗଲା | ପରେ ତାଙ୍କ ସ୍ଥାନରେ ଗୋପୀନାଥ ପ୍ରଧାନଙ୍କୁ ନିଯୁକ୍ତି ଦିଆଗଲା | ସେ ଅଞ୍ଚଳର ପରିସ୍ଥିତି ବିଷୟରେ ସମୀକ୍ଷା କରିବା ଅର୍ଥାତ ୬ ମାସ ନ ପୁରୁଣୁ ତାଙ୍କୁ ମଧ୍ୟ ଅନ୍ୟତ୍ର ବଦଳି କରି ଦିଆଗଲା | ଫଳରେ ଏଠାରେ ସୁରକ୍ଷା ବଳୟ ଭୁଷୁଡ଼ିବା ପୂର୍ବରୁ ଏବଂ କଣ୍ଟାମାଳର ଗୁରୁତ୍ୱକୁ ଦୃଷ୍ଟିରେ ରଖି ଜଣେ ଯୁବ ଓ ଦକ୍ଷ ପୋଲିସ ଅଧିକାରୀଙ୍କୁ ନିଯୁକ୍ତି ଦେବାକୁ ବୁଦ୍ଧିଜୀବୀ ମହଲରେ ଦାବି ହେଉଛି | ଆଗାମୀ ନିର୍ବାଚନ ଓ ବଢୁଥିବା ଅପରାଧିକ କାର୍ଯ୍ୟକଳାପକୁ ଦୃଷ୍ଟିରେ ରଖି ବୌଦ୍ଧ ଏସପି କଣ୍ଟାମାଳ ଥାନାରେ ଜଣେ ଯୁବ ଦକ୍ଷ ଥାନା ଅଧିକାରୀଙ୍କୁ ନିଯୁକ୍ତି ଦେବାକୁ ସାଧାରଣରେ ଦାବି ହେଉଛି।
କଣ୍ଟାମାଳରୁ ପ୍ରଭାତ କୁମାର ସାହୁଙ୍କ ରିପୋର୍ଟ ସମର୍ଥ ନିୟୁଜ
