ଅଧ୍ୟାପକ ପ୍ରଦୀପ୍ତ କୁମାର ଦାସ
ତୁ କୁଆଁ କୁଆଁ କଲୁ ଯେଉଁଦିନ
ସେଦିନ ହେଲି ମୁଁ ମାମୁ –
ସରଗର ଶଶୀ ଧରାଇ ତୋ ହାତେ
ଫେରିବି ମୁଁ ଧରାଧାମୁ,
ବିପଦେ ଆପଦେ ସାହା ହେବି ସଦା
ଧୈଇର୍ଯ୍ୟ ସାହସ ଦେଇ –
ଅଳି ଅରଦଳି ସବୁ ସହିବି ମୁଁ
ନେଇ ତତେ ଆପଣେଇ,
ଯାହା ଯେତେବେଳେ ଦରକାର ତୋର
କହିବୁ ତୁ ମନ ଖୋଲି –
ସପନରେ ସୁଦ୍ଧା ଭାବିବୁନି କେବେ
ମାମୁ ତୋର ପର ବୋଲି,
ଭଲ ପାଠ ପଢ଼ି ବଡ଼ ମଣିଷଟେ
ହୋଇବୁ ତୁ ଯେଉଁଦିନ –
ଖୁସିରେ ମୋ ଛାତି କୁଣ୍ଢେ ମୋଟ ହେବ
ନାଚିଯିବ ମୋର ମନ,
ମୋ ଭଉଣୀ ଓଠେ ହସ ଦେଖିବାକୁ
ତତେ ସବୁକିଛି ଦେବି –
ଏ ଦୁନିଆ ତତେ ପର ଭାବିଲେ ବି
ମୁଁ ତୋର ନିଜର ଥିବି,
ସାବିତ୍ରୀ ବ୍ରତରେ ଦୁତିଆ ଓଷାରେ
ପ୍ରତିବର୍ଷ ପହଞ୍ଚିବି –
ପ୍ରଥମାଷ୍ଟମୀରେ ତୋଅ ପସନ୍ଦର
ପୋଷାକ ନିଶ୍ଚେ ମୁଁ ନେବି,
ମାମୁ ଘରକୁ ତୁ ନିଜଘର ଭାବି
ଆସୁଥିବୁ ବାର ବାର –
ମୁଁ ମରିଗଲେ ମୋ ଶବ ଉପରେ
ଝରାଇବୁ ଲୁହଧାର।
*** *** ***
କଣ୍ଟାବଣିଆ, ଛତ୍ରପଡ଼ା,ପ୍ରୀତିପୁର,ଯାଜପୁର, ଓଡ଼ିଶା
