– ଅଧ୍ୟାପକ ପ୍ରଦୀପ୍ତ କୁମାର ଦାସ –
ହରି-ହରଙ୍କର ମିଳନ ଦିବସ
ବଇକୁଣ୍ଠ ଏକାଦଶୀ –
ଏହି ପୁଣ୍ୟଦିନ ଭକତଙ୍କ ମନ
ଆକାଶରେ ଶୁଭ ଶଶୀ।
କାର୍ତ୍ତିକ ପୂର୍ଣ୍ଣିମା ପୂର୍ବଦିନ ଏହି
ଏକାଦଶୀ ପଡିଥାଏ –
ବିଷ୍ଣୁଙ୍କ ସହିତ ପୂଜି ଶଙ୍କରଙ୍କୁ
ଭକ୍ତଜନ ମୁକ୍ତି ପାଏ।
ବୈକୁଣ୍ଠ ବିହାରୀ ବିଷ୍ଣୁଙ୍କୁ ଯେ ଭକ୍ତ
ଏହିଦିନ ପୂଜିଥାନ୍ତି –
ପୁଣ୍ୟ ଲାଭକରି ମୃତ୍ୟୁପରେ ସେତ
ବୈକୁଣ୍ଠପୁରକୁ ଯାନ୍ତି।
ରାତ୍ରକାଳେ ପଦ୍ମଫୁଲ ଦେଇ ପ୍ରଭୁ
ବିଷ୍ଣୁଙ୍କୁ ତ ପୂଜା ଯାଏ –
ତା ପରଦିନ ଯେ ପ୍ରଭୁ ଶଙ୍କରଙ୍କୁ
ଆରାଧନା କରାଯାଏ।
ଏହିଦିନ ବିଷ୍ଣୁ ଶତଶହ ପଦ୍ମେ
ଶଙ୍କର ପୂଜିବା ପାଇଁ –
କାଶୀ ସ୍ଥିତ ମଣିକାଞ୍ଚନ ଘାଟକୁ
ନିଜେ ଯାଇଥିଲେ ଧାଇଁ।
ଅଭିଷେକ ସାରି ଅର୍ଘ୍ୟ ଦେବା କାଳେ
ଏକ ପଦ୍ମ ଊଣା ହେଲା –
ପଦ୍ମଲୋଚନକୁ ଏହି ଅଘଟଣ
ଦାରୁଣ ଆଘାତ ଦେଲା।
ସଂଗେ ସଂଗେ ନିଜ ଲୋଚନରୁ ଏକ
ଦେବାକୁ ଉଦ୍ୟତ ହେଲେ –
ଏହି ସମୟରେ ପ୍ରଭୁ ସଦାଶିବ
ଉଭା ହୋଇ ବାଧା ଦେଲେ।
ପ୍ରସନ୍ନ ହୋଇଣ ବୈକୁଣ୍ଠପତିଙ୍କୁ
ଶ୍ରେଷ୍ଠଭକ୍ତ କହିଦେଲେ –
ବିଷ୍ଣୁ ଭକତଙ୍କୁ ବଇକୁଣ୍ଠେ ସ୍ଥାନ
ଦେବାକୁ ଗୁହାରୀ କଲେ।
ତାପରେ ଖୁସିରେ ସୁଦର୍ଶନଚକ୍ର
ବିଷ୍ଣୁଙ୍କୁ ପ୍ରଦାନ କଲେ –
ସକଳ ସୃଷ୍ଟିର ଭାର ସମରପି
ସୁତଳଲୋକକୁ ଗଲେ।
ବଇକୁଣ୍ଠ ଏକାଦଶୀର ମହିମା
ଅତି ପୁଣ୍ୟମୟ କଥା –
ଆସ ଆମେ ସର୍ବେ ପାଳିବା ଏ ବ୍ରତ
ନୁଆଁଇ ଭକ୍ତିରେ ମଥା।
***
କଣ୍ଟାବଣିଆ,ଯାଜପୁର
